Գլխավոր
հովանավոր

2004 թվականին ՈՒԵՖԱ-ն իր հերթական կոնգրեսում որոշում կայացրեց ֆուտբոլի զարգացման և մասսայականացման, ինչպես նաև ֆուտբոլի «սոցիալական պատասխանատվության» շրջանակներում եվրոպական ֆուտբոլի ունեցած միջոցներից կատարել ներդրում եվրոպական ֆուտբոլային ընտանիքի բոլոր երկրներում` «փոքր դաշտերի» տեսքով: Բազմաֆունկցիոնալ «փոքր դաշտերը» կոչված էին խթանելու թե սպորտի, ընդհանրապես, և թե ֆուտբոլի, մասնավորապես, զարգացումն ու մասսայականացումը:
Որոշում կայացվեց ՈՒԵՖԱ-ի անդամ բոլոր ասոցիացիաներին հատկացնել մեկական միլիոն շվեյցարական ֆրանկ 2005-2008թթ ընթացքում այդպիսի` նվազագույնը 20 «փոքր դաշտեր» իրենց երկրներում կառուցելու նպատակով: Եվ, որպես առաջին քայլ` ՈՒԵՖԱ-ն իր 50 ամյակի կապակցությամբ հոբելյանական «փոքր դաշտեր» նվիրաբերեց իր բոլոր անդամներին: Հայաստանում այն տեղադրվեց Երևան, Ագաթանգեղոսի 7 հասցեում, և որի հանդիսավոր բացումը կատարվեց ՈՒԵՖԱ-ի գործադիր կոմիտեի անդամ Պեր Ռավն Օմդալի և Հայաստանի ֆուտբոլի ֆեդերացիայի նախագահ Ռուբեն Հայրապետյանի մասնակցությամբ:
Ծրագիրն ուներ առանձնահատկություններ և նախատեսում էր, որ նախ այն պետք է շահառու պետությունների կողմից ազատվեր բոլոր հարկերից, և որ ծրագրին պետք է պարտադիր մասնակցություն ունենային նաև տվյալ երկրների ֆեդերացիաները և բոլոր այն համայնքները, որոնք` որպես նվիրաբերություն կստանային «փոքր դաշտեր»: ՀՖՖ-ն դիմեց ինչպես ՀՀ կառավարությանը, այնպես էլ բոլոր մարզերի ղեկավարներին` ծրագիրը որպես մարդասիրական որակելու և «փոքր դաշտերի» կառուցման և հետագայում համայնքներին նվիրաբերման նպատակով ՀՖՖ-ին տարածքներ հատկացնելու համար:
Խնդրանքին արագ արձագանքեցին 7 մարզեր, որի արդյունքում տեղական ինքնակառավարման մարմինները պարտավորվեցին հոգալ «փոքր դաշտերի» տեղադրման համար տարածքի պատրաստման, լուսավորության ապահովման և հետշահագործման խնամքի և պահպանման ծախսերը:
Առաջին դիմող - առաջին բավարարվող, ինչպես նաև հնարավորինս խիտ բնակեցված և հանրակրթական դպրոցներին մոտ լինելու սկզբունքներով, ՀՖՖ-ն ընտրեց տարածքները և 2005-2007 թթ ընթացքում կառուցեց նմանատիպ 42 «փոքր դաշտեր», որոնք էլ հետագայում նվիրաբերվեցին տեղական համայնքներին:



Այստեղ նշված են այն քաղաքները, որտեղ տեղադրվել են «փոքր դաշտեր»